Busca en nuestra página

 

— Este programa da Vicepresidencia Primeira e Consellería de Economía, Industria e Innovación ten un orzamento de 5 millóns de euros e mobilizará 17 millóns nos establecementos de proximidade.

— A primeira convocatoria tivo máis de 230.000 clientes beneficiarios e contribuíu a fortalecer o sector comercial tras os efectos da pandemia.

— Os bonos desconto terán formato dixital QR e estarán dispoñibles para ser utilizados nunha aplicación móbil.

— Esta iniciativa súmase a outras liñas de axudas para o comercio galego promovidas pola Vicepresidencia Primeira, como ás de transformación dixital, modernización, dinamización e incentivación do consumo.

A segunda edición dos bonos Activa Comercio, iniciativa impulsada pola Xunta de Galicia co obxectivo de dinamizar e reactivar o sector comercial galego, permitirá mobilizar máis de 17 millóns de euros en compras e fomentar, deste xeito, o consumo no comercio de proximidade.

Mediante este programa impulsado pola Vicepresidencia Primeira e Consellería de Economía, Industria e Innovación e que se porá en marcha nas vindeiras semanas tras ser abordado recentemente no Consello da Xunta, os clientes poderán acceder a un bono desconto por un valor de 30 euros para as compras nos comercios adheridos. Deste xeito, a Xunta reforza a súa aposta “por reactivar e dinamizar ao pequeno comercio, marcado primeiro pola pandemia” e agora polo contexto económico de suba de prezos, afirmou o presidente da Xunta, Alfonso Rueda.

 

VIXENCIA ATA O 15 DE DECEMBRO

Os bonos terán formato dixital QR e estarán dispoñibles para a súa utilización nunha aplicación móbil. O importe irase reducindo en función do valor da compra. Así, ás compras iguais ou superiores a 20 euros e inferiores a 30 euros corresponderalle un desconto de 5 euros. A rebaixa será de 10 euros para as compras iguais ou superiores a 30 euros e inferiores a 50. A partir desta cantidade, o desconto alcanzará os 15 euros. O período de validez dos bonos estenderase ata o 15 de decembro, salvo esgotamento previo do seu saldo.

Con esta iniciativa, de cuxa primeira edición se beneficiaron máis de 230.000 clientes, búscase continuar estimulando as vendas, sobre todo no pequeno comercio, e incrementar o fortalecemento e a reactivación económica do comercio retallista, contribuíndo a paliar o impacto da actual situación económica.

Cun orzamento que alcanza os 5 millóns de euros, este programa da Xunta súmase ás distintas liñas de axudas específicas para o comercio galego promovidas pola Vicepresidencia Primeira e Consellería de Economía, Industria e Innovación, centradas en eidos como a transformación dixital e a modernización do sector, así como para a dinamización e incentivación do consumo a través dos centros comerciais abertos e federacións de comerciantes e o impulso das prazas de abastos.

 

Máis información: https://www.bonosactivacomercio.gal/es/cliente-2/

 

 

 

 

 

 

 

 

 

 

 

 

 

 

 

CEG - Confederación de empresarios de Galicia

 

 

 

 

 

 

 

 

Asociación de Empresarios Gallegos en Madrid