. A conselleira de Economía, Industria e Innovación foi a encargada de inaugurar o certame, que este ano prolongarase durante un mes na coñecida cadea mexicana de retail

. Nas vindeiras semanas, o produto galego e as empresas galegas que operan no país verán incrementada a súa promoción no mercado mexicano

. María Jesús Lorenzana lembrou na súa intervención que o 30 Aniversario da Quincena de Galicia coincide ademais co 30 aniversario do Instituto Galego de Promoción Económica (Igape)

. No fortalecemento dos lazos económicos co exterior salientou iniciativas da Xunta como a de ofrecer seguridade, simplicidade e axilización na tramitación de novos proxectos

. En Cidade de México, a conselleira visitará a empresa Optare Solutions, TIC galega con sede central en Vigo que este mes celebra os dez anos de actividade da súa filial mexicana

A conselleira inaugurando o acto do 30 Aniversario da Quincena de Galicia en Palacio de Hierro

A conselleira de Economía, Industria e Innovación, María Jesús Lorenzana, avogou por seguir ampliando e fortalecendo as relacións comerciais entre Galicia e México para promover novos investimentos. Fíxoo durante a súa intervención no acto de conmemoración do 30 aniversario da Quincena de Galicia en México, no Palacio de Hierro.

Trátase dun evento promocional que se celebrou por primeira vez en 1992 organizado pola Xunta de Galicia e esta coñecida empresa mexicana da cadea retail, que contribuíu a ampliar a presenza no país de diferentes empresas galegas, fundamentalmente, do sector téxtil e agroalimentario. Desta volta, conmemorando o 30 aniversario deste certame, vólvese celebrar pero cun mes de duración, no cal, o Palacio de Hierro será o escaparate do produto galego e das empresas que operan no país.

A conselleira de Economía Industria e Innovación foi a encargada de inaugurar o certame, onde apuntou que coincide, ademais, coa celebración do 30 aniversario do Instituto Galego de Promoción Económica (Igape). “30 anos transformando Galicia e o desenvolvemento da economía galega”, dixo, para lembrar que son 30 anos, tamén, “desde que se abriron as portas de México a Galicia cun evento especial sobre as nosas empresas e os nosos produtos”.

No stand de Galicia Calidade en Palacio de Hierro

EMPRESAS EMBAIXADORAS

Seguindo esta liña, Lorenzana apelou na súa intervención a seguir fortalecendo os lazos económicos entre Galicia e México e a explorar novas oportunidades de negocio. Nese sentido, puxo de manifesto a aposta que a Xunta de Galicia está facendo por dar seguridade e ofrecer simplicidade e axilización na tramitación de novos proxectos e, doutra banda, como México supón a porta de entrada ao mercado estadounidense. A conselleira tamén tivo palabras para as empresas galegas no país presentes no acto, ás que convidou a manter e fomentar a marca Galicia no seu papel de embaixadoras.

Na axenda do mércores, a titular de Economía, Industria e Innovación tamén tivo ocasión de participar na xuntanza da asociación galega Real Impact Women, un proxecto para impulsar o liderado feminino no mundo empresarial. A conselleira eloxiou a súa iniciativa e capacidade para darlle eco internacional.

Durante a visita á asociación galega Real Impact Women

A axenda en Cidade de México inclúe a visita de Lorenzana á empresa Optare Solutions, compañía galega con sede central en Vigo que este mes celebra os dez anos de actividade da súa filial en México, onde traballan unha vintena de persoas. É unha firma moi activa en I+D+i que actualmente traballa en proxectos relacionados co 5G, o vehículo conectado e a fábrica intelixente. Segundo a conselleira, é un exemplo das perspectivas de crecemento e expansión que ten por diante o sector TIC galego e do talento dos seus profesionais.

Lorenzana na antena do Igape en México