Últimas Noticias

Consellería de Economía, Industria e Innovación

Lorenzana aboga por unha política económica de apoio á empresa para incentivar o investimento en Galicia e o asentamento de novos proxectos industriais

Lorenzana aboga por unha política económica de apoio á empresa
  • Remarca fortalezas como achegar seguridade xurídica e desburocratizar para acelerar a tramitación de novos proxectos, e reivindica unha política enerxética vinculada ao sector industrial para abaratar o prezo da electricidade

  • Ao referirse aos fondos europeos, lembra que cada día que pasa sen que o diñeiro estea no tecido produtivo “é un día perdido para a empresa”

  • Subliña o rol da Oficina Económica de Galicia como “porta de entrada única” para o asesoramento empresarial e o plan de aceleración de proxectos industriais como “vía rápida” para tramitar investimentos, coa Secretaría Xeral de Industria como único interlocutor

  • A conselleira de Economía, Industria e Innovación participou na presentación do informe `Retos e perspectivas económicas en Galicia para o ano 2024´, elaborado por BDO

  • O estudo constata o optimismo que se percibe no tecido empresarial galego, a pesar do contexto macroeconómico e internacional

A conselleira de Economía, Industria e Innovación, María Jesús Lorenzana, defendeu unha política económica de apoio á empresa para incentivar o investimento en Galicia e o asentamento de novos proxectos industriais. Así o manifestou na presentación do informe `Retos e perspectivas económicas en Galicia para o ano 2024´, elaborado por BDO.

Durante a súa intervención, Lorenzana salientou a necesidade de achegar seguridade xurídica e de desburocratizar para acelerar a tramitación de novos proxectos, e reivindicou unha política enerxética vinculada ao sector industrial para abaratar o prezo eléctrico. Con respecto aos fondos europeos, reiterou que “cada día que pasa que o diñeiro non está no tecido produtivo é un día perdido para a empresa”.

Neste contexto, subliñou o labor da Oficina Económica de Galicia, “porta de entrada única” para o asesoramento empresarial; e o plan de aceleración de proxectos industriais, que implica que calquera proxecto ten “unha vía rápida” para a súa tramitación e un único interlocutor que é a Secretaría Xeral de Industria.

“FINANCIAMENTO ALTERNATIVO E MÁIS BARATO”

Tamén adiantou que a Administración autonómica está traballando nun mapa industrial e en plans directores por sectores para detectar as necesidades en materia de solo industrial. E, finalmente, referiuse ás liñas de financiamento que ofrece a Xunta, ”adaptadas aos tempos” para “dar un financiamento alternativo e máis barato ao que pode dar hoxe en día unha entidade de crédito”. Nesta liña, citou o fondo público-privado que promove a sociedade Impulsa Galicia, do que dixo que dará saída a moitos proxectos transformadores e que se espera que estea activado “a partir da segunda metade do ano”.

En relación ao informe, destacou, tal e como se recolle, o optimismo que se percibe no tecido empresarial galego, a pesar do contexto macroeconómico e internacional. Segundo se reflicte, oito de cada dez empresas que participaron cren que a Galicia iralle igual ou mellor que ao resto de España (45,3%). Ningunha delas prevé que a súa evolución sexa negativa en 2024 e case seis de cada dez apuntan ao crecemento este ano. A conselleira tamén mencionou, neste punto, o rexistro de exportacións, que fan de Galicia a comunidade con mellor balanza comercial de España (máis de 8.470 M€) de xaneiro a novembro.

Lorenzana concluíu reiterando o compromiso da Xunta por “seguir apoiando ós sectores nos que Galicia é líder, e á empresa, para que todo o cambio vinculado á sustentabilidade sexa capaz de facelo, de facelo ben e facelo rápido”, remarcou, tanto na parte vinculada á descarbonización como á sustentabilidade social e á retención de talento.

Financiado por la Unión Europea, NextGenerationEU
Plan de Recuperación, Transformación y Resiliencia