Últimas Noticias

Consellería de Economía, Industria e Innovación

Lorenzana destaca que a nova aceleradora de empresas ClimaTech impulsará proxectos nun sector “con infinitas posibilidades no momento actual”

  • A conselleira de Economía, Industria e Innovación en funcións presentou esta innovadora business factory na asemblea xeral do Clúster Galego de Solucións Ambientais e Economía Circular (Viratec)

  • Lorenzana salienta que ClimaTech, que parte cun orzamento de 6,3 millóns de euros, reforza a aposta de Galicia polo emprendemento innovador

  • Poderán acollerse á nova aceleradora os emprendedores con proxectos innovadores, con vocación de internacionalización e con potencial para fortalecer o sector creando empresas de alto impacto económico, social e ambiental

  • En tres anos apoiará unha selección de 38 proxectos, 5 na fase de incubación, 18 na de aceleración e 15 na de consolidación

  • ClimaTech súmase á rede de aceleradoras verticais e de iniciativas que abranguen todo tipo de actuacións e de localizacións territoriais

A conselleira de Economía, Industria e Innovación en funcións, María Jesús Lorenzana, participou na asemblea xeral de Viratec-Clúster Galego de Solucións Ambientais e Economía Circular, onde presentou o acordo de colaboración entre esta organización e a Xunta -a través do Igape, Gain e Xesgalicia- para a posta en marcha da nova Business Factory ClimaTech. Segundo salientou Lorenzana, esta aceleradora de empresas permite reforzar a aposta polo emprendemento innovador da Xunta de Galicia, impulsando novos proxectos nun campo que, tal e como sinalou, “ten infinitas posibilidades no momento actual” e que vai permitir “diversificar e potenciar a economía galega”.

A responsable de Economía, Industria e Innovación, fixo fincapé en que o Goberno galego busca “crear en Galicia un polo de atracción empresarial, un ecosistema que sexa favorable para o emprendemento, a creación e o crecemento das empresas e as sinerxías empresariais”, sinalando que para iso é necesaria a colaboración entre todos os axentes.

ClimaTech permitirá impulsar novos proxectos empresariais en toda a cadea de valor do sector e reforzar a aposta de Galicia pola sustentabilidade ambiental do tecido produtivo. A nova business factory contará cun orzamento de preto de 6,3 M€, dos que a Xunta achegará máis do 95% para desenvolver, durante os próximos tres anos, sucesivas convocatorias de carácter anual que permitirán impulsar 38 proxectos nas fases de incubación (5), aceleración (18) e consolidación (15).

Poderán acollerse emprendedores con proxectos innovadores, con vocación de internacionalización e con potencial para fortalecer o sector das solucións ambientais e da economía circular. Os participantes en ClimaTech contarán con titorizacións e recursos para dar forma ás súas ideas e convertelas en conceptos empresariais; con formación específica adaptada ás necesidades de cada un; ou con talleres grupais impartidos por expertos de prestixio no ámbito nacional e internacional.

Así mesmo, os beneficiarios disporán de titores con experiencia no sector ambiental e outras industrias conexas ao tempo que compartirán actividades conxuntas e gozarán de intercambios internacionais en ecosistemas colaboradores.

CONVOCATORIA EN CINCO FASES

Cada edición do programa organizarase conforme a cinco fases: unha primeira de definición de retos e focalización dos proxectos; outra de lanzamento da convocatoria e difusión; a terceira, centrada na selección dos proxectos con maior potencial de incubación, aceleración e consolidación; unha cuarta que atenderá á execución dos itinerarios; e a última, de seguimento do impacto do programa.

Esta iniciativa forma parte da decidida aposta da Xunta de Galicia por impulsar aceleradoras de empresas, con actuacións que abranguen todo tipo de proxectos e localizacións territoriais. Unha ampla rede na que destacan as aceleradoras verticais no sector da automoción (BFAuto), aeroespacial (BFAero), fármacos (BFMedicines) ou no sector da alimentación (BFFood). Completan a rede outras iniciativas como VíaGalicia, emprendemento innovador, multisectorial, especialmente no ámbito das TIC, agroalimentario ou téxtil, en colaboración co Consorcio da Zona Franca (Vigo e Lugo); así como Galicia Avanza, para a internacionalización de pemes, en colaboración con Tecnópole; ou Turislab, para proxectos turísticos.

Financiado por la Unión Europea, NextGenerationEU
Plan de Recuperación, Transformación y Resiliencia