Consellería de Economía e Industria

• O presidente da Xunta define o rol da sede ourensá como “ferramenta de enorme calado estratéxico para dinamizar as relacións económicas, culturais e de arraigo entre ambos os territorios”
• Rueda gabou a emigración galega por ser un “piar indispensable para comprender a identidade, o pasado e o presente de Galicia”, e destacou o “lugar preferente” que ocupa México
• Felicitou ao novo cónsul honorario, Alfonso Pereira, de quen dixo que asume “a valente responsabilidade de converterse no rostro de México na Comunidade galega, servindo de soporte directo á cidadanía mexicana residente en Galicia”
• Destacou que a Xunta está a fomentar o regreso dos galegos e descendentes na diáspora a través da Estratexia Galicia Retorna, que xa facilitou o retorno dunhas 50.000 persoas vinculadas coa Comunidade desde a súa posta en marcha en 2018
• Rueda puxo en valor que máis da metade dos retornados son menores de 45 anos, o que contribúe ao rexuvenecemento demográfico de Galicia, ao reforzo do mercado de traballo e á creación de novos fogares
• Anticipou excelentes perspectivas para o Xacobeo 2027 e detallou que o pasado ano chegaron a Santiago máis de 12.000 peregrinos procedentes de México, principal país emisor de camiñantes americanos de fala hispana

O presidente da Xunta, Alfonso Rueda, asistiu á inauguración oficial do novo Consulado Honorario de México en Galicia, con sede en Ourense, o cal definiu como unha ferramenta de enorme calado estratéxico para dinamizar as relacións económicas, culturais e de arraigo entre ambos os territorios. Así, asegurou que servirá para reforzar o retorno da diáspora asentada no país azteca e atraer tamén investimentos.

Durante o acto, o titular do Goberno galego gabou o papel da emigración como piar indispensable para comprender a identidade, o pasado e o presente de Galicia. Neste sentido, remarcou o lugar preferente que ocupa México, ao ter sido e continuar sendo o fogar de miles de galegos e galegas.

O mandatario autonómico felicitou expresamente ao novo cónsul honorario, Alfonso Pereira, e asegurou que asume a valente responsabilidade de converterse no rostro de México na Comunidade galega, servindo de soporte directo á cidadanía mexicana residente en Galicia e consolidando o nexo de unión dos galegos que manteñen intactos os seus vínculos afectivos e comerciais co país. Neste sentido, incidiu en que a Galicia do presente é unha terra de oportunidades capaz de ofrecer aos investidores internacionais os activos máis demandados na actualidade: estabilidade, seguridade xurídica, crecemento sostido e unha situación xeográfica privilexiada para a implantación de novos proxectos industriais.

            50.000 RETORNADOS DESDE 2018

Precisamente por coñecer de primeira man o fenómeno migratorio, o titular da Xunta explicou que o Goberno autonómico está a fomentar o regreso dos galegos e descendentes na diáspora a través da Estratexia Galicia Retorna, que xa facilitou o retorno dunhas 50.000 persoas vinculadas coa Comunidade desde a súa posta en marcha no ano 2018. Do mesmo xeito, puxo en valor que máis da metade destes retornados son menores de 45 anos, un factor que contribúe de forma directa ao rexuvenecemento demográfico de Galicia, ao reforzo do mercado de traballo e á creación de novos fogares.

Co obxectivo de seguir atraendo o talento dos mozos do exterior, o presidente da Xunta reafirmou a vixencia de ferramentas consolidadas inseridas nesta Estratexia como as bolsas BEME —destinadas a cursar estudos de máster nalgunha das tres universidades públicas galegas— e o programa Retorna Cualifica Emprego, que vincula o regreso a un contrato de traballo indefinido e que conta cunha nova edición en marcha dotada con 2,3 millóns de euros.

Durante a súa intervención, Alfonso Rueda vinculou o valor identitario de Galicia como terra de acollida coa inminente celebración do Xacobeo 2027. A este respecto, anticipou unha masiva afluencia de visitantes e salientou que, só durante o pasado ano, chegaron a Santiago de Compostela máis de 12.000 peregrinos procedentes de México, consolidándose como o principal país emisor de camiñantes americanos de fala hispana.