Consellería de Economía e Industria

• O grupo estatal chinés é o propietario da planta CITIC Censa do Porriño, referente internacional en caldeirería pesada e compañía con 60 anos de traxectoria
• As conselleiras de Economía e Industria e de Medio Ambiente e Cambio Climático, María Jesús Lorenzana e Ángeles Vázquez, deron continuidade ao encontro do día anterior entre Alfonso Rueda e Xi Guohua, presidente de CITIC Group
• Nas dúas recepcións á cúpula do grupo chinés abordáronse as oportunidades que se abren en sectores clave como a industria de alta tecnoloxía, o desenvolvemento de novos materiais, o urbanismo sustentable e os servizos financeiros
• Alfonso Rueda enxalzou que Galicia ofrece seguridade xurídica e as máximas facilidades para estimular novas iniciativas empresariais a través de medidas como a Oficina Económica de Galicia ou as ZAPES (Zonas de Aceleración de Proxectos Empresariais e Só Industrial)

As conselleiras de Economía e Industria, María Jesús Lorenzana, e de Medio Ambiente e Cambio Climático, Ángeles Vázquez, mantiveron un encontro co presidente de CITIC Group Corporation, Xi Guohua, e outros representantes da compañía no que expuxeron as facilidades e oportunidades que ofrece Galicia, e que a converten nunha comunidade ideal para facer investimentos, ao tempo que avaliaron as existentes no mercado chinés.

Este encontro, que dá continuidade ao mantido o día anterior polo presidente da Xunta, Alfonso Rueda, pretende reforzar as relacións económicas entre as partes tendo en conta que o grupo chinés é o propietario da planta CITIC Censa do Porriño, un referente internacional no eido da caldeirería pesada e cunha traxectoria que se remonta a 1965.

As representantes do Executivo galego trasladáronlle aos responsables da corporación chinesa a importancia que ten para Galicia contar con empresas que xeren riqueza e emprego de calidade na Comunidade, comprometidas co medio ambiente e que aposten constantemente pola I+D+i, pois ese xeito de traballar provoca un efecto tractor no resto do tecido produtivo existente na contorna.

Na véspera desta recepción á delegación de CITIC Group, o presidente da Xunta, Alfonso Rueda, mantivo en Vigo un encontro previo con Xi Guohua, presidente do grupo estatal chinés, co obxectivo de avaliar posibles vías de colaboración estratéxica entre Galicia e China.

Nesa xuntanza, na que participou tamén a conselleira de Economía e Industria, María Jesús Lorenzana, sinaláronse as oportunidades que se abren para as relacións económicas entre Galicia e o país asiático en sectores clave como os servizos financeiros, a industria de alta tecnoloxía, o desenvolvemento de novos materiais e as solucións de urbanismo sustentable.

SEGURIDADE XURÍDICA E FACILIDADES ADMINISTRATIVAS

O presidente autonómico trasladou que a Xunta traballa para converter Galicia nun polo de atracción industrial e que é prioritario espertar o interese e a confianza dos grandes grupos empresariais. Rueda, que fixo fincapé na estabilidade da Comunidade, lembrou que Galicia ofrece aos posibles investidores seguridade xurídica e as máximas facilidades administrativas desde o estrito cumprimento á normativa ambiental.

Así, están en marcha medidas como a Oficina Económica de Galicia, un novo modelo de atención entre a Administración e as empresas pioneiro en España e deseñado para asesorar, ofrecer soportes e axuda especializada. Desde a súa posta en marcha o pasado ano, xa tramitou máis de 21.000 consultas.

Ademais, tal e como lembrou o responsable do Executivo autonómico, Galicia dispón de solo industrial cunha tramitación máis áxil grazas á posta en marcha de novas figuras como as Zonas de Aceleración de Proxectos Empresariais e Só (Zapes) para estimular novos proxectos empresariais.