Consellería de Economía e Industria

• María José Lorenzana inaugurou a XI edición do encontro `El Mundo que viene´, organizado pola Asociación para el Progreso de la Dirección (APD)

• “Estamos plantexando unha política económica moi vinculada á atracción de empresas, a aumentar o peso industrial da nosa comunidade, e ligada ao aproveitamento dos nosos recursos naturais e ao desenvolvemento enerxético de Galicia”, enxalzou na súa intervención

• Como exemplos aludiu ao orzamento do Igape para 2025, que medra un 20% ata os 278 millóns de euros, e que reserva 152 millóns para instrumentos de financiamento empresarial, con tipos de xuros ao 0% e prazos de amortización de ata 12 anos

• Tamén salientou o reforzo de Xesgalicia “cun efecto mobilizador moi importante tanto nas operacións de financiación como de capitalización, con saldos para investimentos de 140M€ para 2025”, precisou a conselleira

• Avanzou que a Lei de recursos naturais de Galicia busca xerar retornos no territorio con instrumentos como Recursos de Galicia ou a nova comercializadora de enerxía, que favorecerán a democratización dos contratos de compravenda de enerxía a longo prazo (PPA) para pemes

• “Por primeira vez podemos dicir que Galicia está posicionada en todas as cuestións que se nos está dicindo que son clave para que Europa despegue”, concluíu Lorenzana, aludindo ao Informe Draghi

Na inauguración do encontro `El Mundo que viene´, organizado pola Asociación para el Progreso de la Dirección (APD), a conselleira de Economía e Industria, María Jesús Lorenzana, salientou a aposta da Xunta por poñer a empresa e o desenvolvemento enerxético e industrial de Galicia no centro da política económica: “Estamos plantexando unha política económica moi vinculada á atracción de empresas, a aumentar o peso industrial que ten a nosa comunidade, e ligada ao aproveitamento dos nosos recursos naturais e ao desenvolvemento enerxético de Galicia”, expuxo.

Lorenzana apuntou que proba disto é que o Instituto Económico de Galicia (Igape) ten o orzamento máis alto dos últimos anos -crece un 20%, ata os 278M€-; e o 50% dese orzamento -152M€, cun incremento do 45,4%- engadiu, vai destinado a instrumentos de financiamento adaptados ás necesidades das empresas, con prazos máximos de amortización de ata 12 anos, tipos de xuro ao 0% e importes de ata 5 millóns de euros.

Nesta liña, sinalou a vontade de potenciar o papel de Xesgalicia, que está a ter un efecto mobilizador moi importante tanto nas operacións de financiación como de capitalización, con saldos para investimentos de 140M€ para 2025. Tamén puxo de relevo a boa acollida da Oficina Económica de Galicia, que leva atendidas máis de 9.500 consultas desde abril e á que se destinan 6,2M€ no orzamentos. E, en terceiro lugar, apuntou á nova área de innovación do Igape que leva dúas liñas propias para empresas: o programa Igape Innova (4M€) para o desenvolvemento de produtos e servizos; e o Ticket Innova (1M€), para pemes de sectores tradicionais e menos innovadores.

DESTINO ATRACTIVO PARA O INVESTIMENTO

Xunto con isto tamén lembrou a creación, na Lei de medidas fiscais e administrativas, de novas figuras de ordenación de solo industrial como son as Zapes (Zonas de aceleración de proxectos empresariais e solo), ás que se destinan 2,5M€. “Todo isto co obxectivo de posicionar Galicia como un destino atractivo e diferenciado para o investimento”, subliñou a conselleira, sabendo que “Galicia ten unha posición privilexiada no contexto actual polos seus recursos naturais. E isto é unha cuestión que é clave en toda a nosa política económica porque temos claro que estamos nun momento en que podemos estar ben posicionados dentro de Europa”, afirmou.

Ao respecto mencionou a Lei de recursos naturais, que busca xerar retornos no territorio e arredor da cal se crearon a sociedade Recursos de Galicia e unha comercializadora de enerxía que favorecerán a democratización dos contratos de compravenda de enerxía a longo prazo (PPA) para a pequena e mediana empresa.

“Por primeira vez podemos dicir que Galicia está posicionada en todas as cuestións que se nos está dicindo que son clave para que Europa despegue”, asegurou, aludindo ao Informe Draghi. “Temos que loitar por ser especialmente pulcros co medio ambiente, organizar o desenvolvemento industrial e enerxético naquelas zonas onde existan menos afeccións industriais, traballar moito cos sistemas loxísticos e, con esta visión e en colaboración coas restantes administracións, coa Universidade e cos centros tecnolóxicos, cremos que Galicia pode posicionarse nos próximos anos”, enfatizou. E concluíu a súa intervención remarcando a importancia do talento e do traballo a prol do benestar laboral das persoas.